Sögusetur íslenska fjárhundsins er einstök sýning, tileinkuð þjóðarhundi Íslendinga. Markmið setursins er að varðveita og miðla sögu íslenska fjárhundsins og gera hana sýnilega og aðgengilega fyrir alla.

Sögusetrið opnaði í maí 2025 eftir þriggja ára undirbúningsvinnu menningarfræðingsins, Evelyn Ýr, sem á heima á Lýtingsstöðum.

Hægt er að lesa um sögu hundsins (á íslensku, ensku, þýsku og frönsku), skoða heimildarmyndir, gamlar ljósmyndir og listaverk. Einnig er hægt að fletta í gegnum bækur og nafna- og litagagnabankann, skoða hundinn í nærmynd og hlusta á sögur. Íslensku fjárhundarnir á bænum mynda skemmtilega móttökunefnd.

Torfhesthús
Innblásin af sögu bæjarins lét fjölskyldan á Lýtingsstöðum hlaða hesthús, skemmu og rétt úr torfi árið 2015. Byggingarnar eru meistaraverk íslensks handverks. Sýning í torfhúsunum segir frá því hvernig hrossum var haldið á árum áður og hvernig saga fólks og hrossa á Íslandi er tengd saman. Boðið er upp á hljóðleiðsögn (á íslensku, ensku, þýsku og frönsku) sem gerir heimsóknina að enn meiri upplifun. Leiðsögnin tekur um 30 mínútur og hentar vel fyrir 6 ára og eldri. Einnig er hægt að fá leiðsögn fyrir hópa.

Lýtingsstaðir
Saga Lýtingsstaða hefst á landnámsöld þegar maður að nafni Lýtingur settist að á jörðinni. Bærinn var höfuðból í margar aldir og hinn forni hreppur, Lýtingsstaðahreppur, bar nafn hans. Hálfkirkja stóð á Lýtingsstöðum frá 11. til 18. aldar og var hún síðar notuð sem þinghús, sem var í notkun fram á 20. öld. Þinghúsið og bæjarhúsið var byggt úr torfi og þiljuð. Fjárhúsin og hesthúsin voru úr torfi með trégöflum. Því miður hefur ekkert af þessum gömlu byggingum varðveist til dagsins í dag, en torfbyggingarnar frá 2015 gefa góða mynd af gamla tímanum á bænum.

Á Lýtingsstöðum hefur verið rekin ferðaþjónusta frá árinu 2000 samhliða hefðbundnum búskap. Boðið er upp á hestaferðir, gistingu, heimsóknir fyrir einstaklinga og móttöku hópa til að kynna íslenska menningararfleifð: íslenska hestinn, íslenskan byggingararf (torfhús) og íslenska hundinn.