Old Icelandic Books býður upp á einstaka menningarupplifun byggða á einu merkilegasta einkasafni íslenskra fornbóka og handrita. Upplifun sem veitir aðgang að lifandi sögu íslenskra bókmennta, þar á meðal frumheimildum af sögu víkinga og norrænnar goðafræði. Tekið er á móti gestum í vinnustofu safnarans og handverksmannsins, Eyþórs Guðmundssonar,  þar sem hann gerir við bækurnar. Litlir hópar eða einstakir gestir eru leiddir í gegnum aldir íslenskrar bókmenntahefðar. Þannig upplifa gestirnir áhrif aldanna í áferð pappírsins, þunga leðurbandanna og texta sem hafa lifað í bókunum öldum saman.

Í safninu eru hundruð vandlega varðveittra rita, allt frá upphafi prentunar á Íslandi á 16. öld og fram á miðja 19. öld.  Þar á meðal mörg af fyrstu prentuðu eintökunum af Íslendingasögunum og fornaldarsögum Norðurlanda. Sögur sem stuðla að skilningi á persónum á borð við Egil Skallagrímsson, Gunnar á Hlíðarenda og Ragnar loðbrók og samfélaginu sem mótaði sögur þeirra. Sögurnar sem mynda grunninn á alþjóðlegri þekkingu á víkingaöldinni og norrænu samfélagi þess tíma sem okkur þykir nú fremur sjálfsögð þekking. Söguleg ritsöfn á borð við Heimskringlu Snorra Sturlusonar sem rituð voru á Íslandi eru enn í dag yfirgripsmestu frásagnarheimildir sem til eru um líf, átök, gildi og heimsmynd norrænna manna.

Í safni Old Icelandic Books er einnig að finna mikið og fjölbreytt safn biblía og annarra guðsorðabóka sem endurspegla mikilvægan þátt í íslenskri og evrópskri bókmennta- og menningarsögu. Þar má finna íslenskar biblíur ásamt fornum biblíum á ýmsum öðrum tungumálum. Þá eru þar einnig aðrar þekktar íslenskar guðsorðabækur sem hafa gegnt lykilhlutverki í lífi þjóðarinnar eins og Grallarinn, Leirgerður og Saltarinn.

ATH: Prófaðu að halda á hamri Þórs, dvergasmíði úr svartálfaheimi. Eingöngu hinir útvöldu geta lyft hamrinum.

Láttu nafn þitt lifa um ókominn tíma og bergmála gegnum aldirnar. Með því að rita nafn þitt í Bók Gestanna hefur þú sett mark þitt á Old Icelandic Books. Það var ekkert sem forfeður okkar þráðu meira en að nafn þeirra lifði um ókominn tíma. Um aldir og löngu fyrir tíma prentlistarinnar hafa menn skilið nafn sitt eftir, það má meðal annars sjá á ristum og rúnum á klettum og í hellum  víða um heim.

Um stofnandann. Eyþór Guðmundsson ólst upp á Beitistöðum í Leirársveit en þar var landsuppfræðingafélagið með prentsmiðju sína frá 1815-1819. Hún var á þeim tíma eina prentsmiðja landsins og þar voru sumar af fágætustu bókum Íslands prentaðar. Frá unga aldri upplifði Eyþór frásagnir horfins tíma gegnum þau sem eldri voru, ömmu og afa en einnig eldri sveitunga sem lifað höfðu tímana tvenna og heyrt sömu sögur, sem gengið höfðu frá þeirra forfeðrum mann fram af manni.