Elsta húsaþyrping landsins í Neðstakaupstað

Byggðasafn Vestfjarða er staðsett í Neðstakaupstað á Ísafirði, þar sem finna má elstu húsaþyrpingu landsins frá seinni hluta 18. aldar. Húsaþyrpingin samanstendur af Faktorshúsi, Krambúð, Turnhúsi og Tjöruhúsi, sem öll voru reist af dönskum einokunarkaupmönnum. Faktorshús og Krambúð eru íbúðarhús í dag, í Turnhúsi er sjóminjasafn og í Tjöruhúsi býður Byggðasafn Vestfjarða upp á aðstöðu fyrir fundi og veisluhöld allt árið.

Bátar, súðbyrðingar og sjósaga Vestfjarða

Safnið á 15 skráða báta, þar af 12 súðbyrðinga, og er meirihluti þeirra sjófær. Bátarnir endurspegla sjósögu og verkmenningu Vestfirðinga og eru mikilvægur hluti af safnkosti Byggðasafns Vestfjarða. Á sumrin er svæðið í Neðstakaupstað líflegt útiverusvæði þar sem gestir geta séð báta, fjöru og saltfisk breiddan á reiti, sem gefur innsýn í hefðbundin störf og líf við sjó.

Harmonikusafn Ásgeirs Sigurðssonar

Á safninu er varðveitt harmonikusafn Ásgeirs Sigurðssonar sem telur um 220 harmonikur. Elsta nikkan er frá um 1830 og hluti safnsins er til sýnis í Turnhúsinu. Harmonikusafnið er einstakt á landsvísu og sýnir þróun og fjölbreytileika þessa hljóðfæris í íslenskri tónlistarsögu.

Vélsmiðja GJS á Þingeyri

Byggðasafn Vestfjarða hefur einnig umsjón með vélsmiðju Guðmundar J. Sigurðssonar (GJS) á Þingeyri, sem hóf starfsemi árið 1913. Vélsmiðjan er merkileg iðnminja og sýnir tækni, verkmenningu og atvinnusögu svæðisins á 20. öld.

Líflegt safnasvæði fyrir alla aldurshópa

Safnasvæðið í Neðstakaupstað er vinsæll áfangastaður fyrir fjölskyldur og ferðafólk. Þar mætast saga, sjór, menning og daglegt líf í lifandi umhverfi sem hentar vel til göngu, útiveru og samkomuhalds. Byggðasafn Vestfjarða er þannig kjörinn staður til að kynnast menningu og sögu Vestfjarða á aðgengilegan og skemmtilegan hátt.

Opnunartími og upplýsingar

Safnið er opið yfir sumartímann samkvæmt auglýstum opnunartímum og utan þess er hægt að bóka heimsóknir eftir samkomulagi. Nánari upplýsingar má finna á vef safnsins eða með því að hafa samband í síma 456 3291 / 862 9908 eða á netfangið byggdasafn@isafjordur.is.

Tíu hugmyndir að afþreyingu á Ísafirði og á norðanverðum Vestfjörðum:

1.  Farðu í ógleymanlega leiðsögn með Helgu leiðsögumanni og lærðu meira um sögu svæðisins.
2.  Skoðaðu útsýnið af nýjum útsýnispalli á Bolafjalli, ef þú þorir!
3.  Skrafaðu við vermann frá fornri tíð í Sjóminjasafninu í Ósvör.
4.  Kynntu þér fyrsta landnema Íslands í Melrakkasetrinu í Súðavík.
5.  Farðu í sjóstangveiði og veiddu í soðið.
6.  Sigldu til Hornstranda eða út í eyjuna Vigur á Ísafjarðardjúpi.
7.  Skoðaðu gömlu Vélsmiðjuna á Þingeyri frá 1913 þar sem allar vélar virka enn.
8.  Skoðaðu lystigarðinn Skrúð í Dýrafirði, sem aðrir skrúðgarðar á Íslandi draga nafn sitt af.
9.  Leggðu upp í kajak-leiðangur framhjá söguslóðum, selum og fuglum.
10.  Gakktu upp með Dynjanda, frægasta fossi Vestfjarða.

Nánari upplýsingar á www.westfjords.is