Í þeim hluta Ísafjarðar sem kallaður er Neðstikaupstaður stendur elsta húsaþyrping landsins. Þetta eru fjögur hús sem öll voru byggð af dönskum einokunarkaupmönnum á 18. öld. Húsaþyrpingin samanstendur af Faktorshúsi, Krambúð, Turnhúsi og Tjöruhúsi. Faktorshús og Krambúð eru nú íbúðahús og í Turnhúsi er sjóminjasafn. Í Tjöruhúsi getur Byggðasafn Vestfjarða boðið uppá aðstöðu til funda- og veisluhalda allan ársins hring.

Byggðasafn Vestfjarða á 15 skráða báta, þar af 12 súðbyrðinga, og er meirihluti þeirra sjófær. Þá er  harmonikusafn Ásgeirs Sigurðssonar (um 220 harmonikur) varðveitt á safninu og er elsta nikkan frá um 1830. Hluti þeirra er til sýnis í Turnhúsinu.

Þá er vélsmiðja Guðmundar J. Sigurssonar (GJS) á Þingeyri, sem hóf starfsemi árið 1913, einnig í umsjón safnsins.

Safnsvæðið í Neðstakaupstað er afar líflegur útiverustaður á sumrin og nýtur vinsælda meðal fjölskyldufólks. Þar er fjara og bátar, saltfiskur breiddur á reiti. Svæðið er einnig mjög vinsælt til allskyns samkomuhalds.

Tíu hugmyndir að afþreyingu á Ísafirði og á norðanverðum Vestfjörðum:

1.  Farðu í gönguferð um gamla bæinn á Ísafiði með Ísafjörður Guide og fræðstu um sögu húsanna og fólksins sem þar bjó.
2.  Farðu í sjóstangveiði og veiddu í soðið.
3.  Skoðaðu útsýnið af nýjum útsýnispalli á Bolafjalli, ef þú þorir!
4.  Skrafaðu við vermann frá fornri tíð í Sjóminjasafninu í Ósvör.
5.  Kynntu þér fyrsta landnema Íslands í Melrakkasetrinu í Súðavík.
6.  Sigldu til Hornstranda eða út í eyjuna Vigur á Ísafjarðardjúpi.
7.  Skoðaðu Gömlu smiðjuna á Þingeyri frá 1913 þar sem allar vélar virka enn.
8.  Skoðaðu listigarðinn Skrúð í Dýrafirði, sem aðrir skrúðgarðar á Íslandi draga nafn sitt af.
9.  Leggðu upp í kajak-leiðangur framhjá söguslóðum, selum og fuglum.
10.  Gakktu upp með Dynjanda, frægasta fossi Vestfjarða.

Nánari upplýsingar á www.westfjords.is