Árnastofnun, eða Stofnun Árna Magnússonar í íslenskum fræðum, er rannsóknarstofnun með sjálfstæðan fjárhag og heyrir undir menningar- og viðskiptaráðherra. Hlutverk hennar er að vinna að rannsóknum í íslenskum fræðum og skyldum fræðigreinum, einkum á sviði íslenskrar tungu og bókmennta, miðla þekkingu á þeim fræðum og varðveita og efla þau söfn sem stofnuninni eru falin eða hún á.

Stofnunin er nýflutt í Eddu sem er ný falleg sporöskjulaga bygging við Arngrímsgötu 5. Byggingin hýsir starfsemi Árnastofnunar og hluta Íslensku- og menningardeildar Háskóla Íslands og er alþjóðleg miðstöð rannsókna og kennslu í íslenskum fræðum.

Þar eru varðveitt margvísleg frumgögn um íslenska menningu: ríflega helmingur handritasafns Árna Magnússonar sem skráð hefur verið á lista UNESCO yfir minni heimsins, skjöl og fornbréf, bréf og skrár um örnefni, seðla- og orðfræðisöfn og hljóðritað þjóðfræðiefni.

Ný sýning verður opnuð í Eddu um miðjan júní 2024. Þá gefst fólki kostur á að sjá íslensku miðaldahandritin sem geyma dýrmætan menningararf. Þar eru fornar sögur og fræg kvæði en einnig ýmsir aðrir textar sem spegla hugmyndir fyrri kynslóða um líf sitt og samfélag. Í sýningunni er kappkostað að opna þennan fjölbreytta heim handritanna fyrir gestum.

Viðburðir verða haldnir reglulega í tengslum við sýninguna, ekki síst þegar handritum er skipt út fyrir önnur. Það þarf að gera með vissu millibili því þau eru viðkvæm, einkum fyrir ljósi.