Hernámssetrið að Hlöðum í Hvalfirði var opnað árið 2012. Þar er sögð einstök og merkileg saga hernáms á árunum 1940 til 1945, saga sem breytti friðsælli sveit í umgjörð heimsviðburða og skipti sköpum fyrir sigur bandamanna í síðari heimsstyrjöld. Þar getur að líta vandað safn minja og minninga sem tengjast sögu hernáms í Hvalfirði á þessum örlagaríku umrótatímum.

Hernámssetrið rekur sögu hersetunnar og skipalestanna, sem lögðu upp í langa og erfiða siglingu frá bækistöðinni í Hvalfirði, og gefur innlendum og erlendum ferðamönnum kost á að kynna sér þessa sögu og arfleifð hennar.

Helstu efnisþættir sem eru til sýnis á Hernámssetinu:

• Bandaríkin
• Börn og leikföng
• Bretland
• Hjúkrun
• Ísland
• Krambúð
• Landhelgisgæslan (1926-45)
• Öryggis og varnarmál
• Rakarastofa
• Rússland
• Þýskaland

Kaffihús og minjgripasala eru á staðnum. Einnig gott tjaldsvæði sem er opið júní-ágúst.

Tíu hugmyndir að afþreyingu í Hvalfirði og nágrenni:

1. Farðu inn í Botnsdal í Hvalfirði og gakktu upp að Glym, hæsta fossi á Íslandi (198 m).
2. Kíktu á nýja baðstaðinn í Hvammsvík við sunnanverðan Hvalfjörð.
3. Slappaðu af í Guðlaugu,  náttúrulauginni á Langasandi á Akranesi  og leiktu við börnin á ströndinni.
4. Heimsæktu Byggðasafn Akraness í Görðum og fræðstu um sögu staðarins í gegnum aldirnar.
5. Skoðaðu Akranesvita (þeir eru tveir!) og fallegt umhverfi þeirra.
6. Gakktu upp á Akrafjall, þú verður ekki svikinn af útsýninu þar.
7. Komdu við á Landbúnaðarsafni Íslands á Hvanneyri og á Ullarselinu þar og fáðu sögu landbúnaðar á Íslandi beint í æð.
8. Kynntu þér íslensku geitina, sem er einstakt kyn, og afurðir hennar í geitabúinu að Háafelli.
9. Heimsæktu Landámssetrið í Borgarnesi og fræðstu um sögu landnáms Íslands, um Egil Skallagrímsson eða farðu á viðburð á Söguloftinu.
10. Leggstu í bleyti í Kraumu heilsulind við Deildartunguhver, öflugasta hver í Evrópu.

Nánari upplýsingar á www.west.is