Sögusvið við sjávarsíðuna á Eyrarbakka

Byggðasafn Árnesinga á Eyrarbakka er lifandi menningarsetur þar sem saga heldri manna og alþýðunnar birtist á fjölbreyttum og vel unnum sýningum. Safnið stendur við sjávarsíðuna í sögulegu umhverfi og er í jaðri Gullna hringsins, einnar vinsælustu ferðaleiðar landsins.

Húsið – menningarheimili frá 1765

Hjarta safnsins er Húsið, reisulegt kaupmannsheimili frá árinu 1765 sem gnæfði yfir torfhúsin í kring. Þar bjuggu kaupmenn í nær tvö hundruð ár og var það jafnfram eitt helsta menningarsetur landsins fram á 20. öld. Innanstokksmunir eru að mestu óbreyttir og gefa einstaka innsýn í líf fína fólksins á Íslandi. Í borðstofu Hússins eru reglulega settar upp nýjar sýningar sem varpa ljósi á sögu staðarins og samfélagsins.

Sögufræg hús og fjölbreyttar sýningar

Auk Hússins standa á safnasvæðinu fleiri merkar byggingar sem hver um sig segir sína sögu. Í Assistentahúsinu, Eggjaskúrnum, Kirkjubæ og Sjóminjasafninu má finna tengingar við líf og störf vinnufólks, sjómanna, iðnarmanna og annarra samfélagshópa. Þar birtast örlagasögur, handverk, leikföng, náttúrurannsóknir og daglegt líf með öllum sínum fjölbreyttu birtingarmyndum.

Fjölskylduvæn upplifun og ratleikur

Byggðasafn Árnesinga er einstaklega fjölskylduvænt safn þar sem gestir á öllum aldri finna eitthvað við sitt hæfi. Skemmtilegur ratleikur leiðir gesti um sýningarnar og sameinar kynslóðir í þrautum sem tengjast safnkosti safnsins. Hér geta gestir upplifað sögu Árnessýslu á lifandi og aðgengilegan hátt.

Tíu hugmyndir að afþreyingu á Gullna hringnum og nágrenni

1. Fáðu þér dýrindis íslenskan humar í veitingahúsi við ströndina, t.d. á Stokkseyri eða Eyrarbakka.
2. Farðu í skipulagða kajakaferð frá Stokkseyri. Á vetrum er hægt að fara í ferðir í myrkrinu og njóta norðurljósanna.
3. Farðu í spennandi fjórhjólaferð um svartar sandstrendur á Suðurlandi.
4. Láttu hræðast upp úr skónum á Draugasetrinu á Stokkseyri.
5. Á hestamiðstöðinni Sólvangi við Eyrarbakka geturðu fengið fræðslu um íslenska hestinn, heimsótt hesthúsið og farið í útreiðartúr.
6. Það eru gildar ástæður fyrir vinsældum Gullna hringsins. Þar eru Þingvellir, Geysissvæðið/Strokkur og Gullfoss – staðir sem allir þurfa að skoða.
7. Ekki missa af því að heimsækja nýja miðbæinn á Selfossi og skoða húsin sem endurgerð eru eftir þekkt íslensk hús frá því um 1900.
8. Bleyttu þig! Auk margra sundlauga á svæðinu eru Reykjadalsá ofan Hveragerðis, Silfra á Þingvöllum (köfun og snorkl), Fontana Spa og Gamla laugin á Flúðum kjörnir staðir til þess.
9. Heimsæktu gróðurhús! Þú getur fræðst um vistheimilið Sólheima, tómataræktun í Friðheimum, svepparækt á Flúðum og smakkað á réttum úr afurðum þeirra.
10. Ímyndaðu þér hvernig er að lifa í helli. Skoðaðu manngerða Laugarvatnshella með leiðsögumanni sem segir frá lífi fólks sem þar bjó fyrir um 100 árum.

Nánari upplýsingar á south.is