Gosminjar og áhrif Heimaeyjargossins

Eldheimar í Vestmannaeyjum er gosminjasýning þar sem fjallað er á áhrifamikinn hátt um Heimaeyjargosið árið 1973. Þá urðu nær allir íbúar eyjunnar, um fimm þúsund manns, að yfirgefa heimili sín í skyndi og flýja eyjuna. Hraun og aska eyðilögðu þriðjung byggðarinnar og tæplega 400 hús og byggingar fóru undir eldgosið. Sýningin dregur fram persónulegar frásagnir, heimildir og raunveruleg ummerki hamfaranna sem mótuðu samfélagið.

Húsið á Gerðisbraut 10

Miðpunktur sýningarinnar er húsið við Gerðisbraut 10 sem grófst undir ösku í gosinu. Húsið hefur verið grafið upp og varðveitt þannig að gestir geta séð á áhrifamikinn hátt hvernig náttúruhamfarirnar fóru með heimili fólks. Þetta einstaka minnismerki gerir gestum kleift að upplifa söguna af ótrúlegri nánd.

Surtsey – nýtt líf rís úr hafi

Á annarri sýningu í Eldheimum er fjallað um þróun Surtseyjar sem reis úr hafi sunnan við Heimaey árið 1963. Eldgosið stóð í nær fjögur ár og eftir gosið var Surtsey gerð að lokuðu náttúruverndarsvæði. Þar hafa vísindamenn fylgst með hvernig nýtt líf og vistkerfi verður til frá grunni. Surtsey hefur verið á heimsminjaskrá UNESCO síðan 2008 og er einstakt rannsóknarsvæði á heimsvísu.

Minjagripir og þjónusta

Í Eldheimum er góð minjagripaverslun þar sem gestir geta fundið vandaðar og sérvaldar minningar tengdar sögu og náttúru Vestmannaeyja. Safnið er í göngufæri frá Skansinum og er vinsæll áfangastaður fyrir öll þau sem vilja kynnast sögu Eyjanna á lifandi og áhrifaríkan hátt.

Nánari upplýsingar

Opnunartímar, aðgangseyri og upplýsingar um leiðsagnir má finna á www.eldheimar.is.

Tíu tillögur að afþreyingu í Vestmannaeyjum og á Suðurlandi

1. Heimsæktu Sagnheima og fræðstu um Tyrkjaránið 1627, ferðir íslenskra mormóna til Utah og Heimaeyjargosið 1973.
2. Gakktu á fell og kletta á Heimaey, svo sem Heimaklett, Helgafell og Eldfell með frábæru útsýni yfir eyjarnar og meginlandið.
3. Njóttu útivistar á Heimaey: kajak, hjólreiðar, sjóböð, golf og fjölbreytt afþreying fyrir alla aldurshópa.
4. Farðu í siglingu um eyjarnar og sjáðu „Fílinn“, lunda og fjölbreytt fuglalíf. Upplýsingar má finna hjá Visit Vestmannaeyjum.
5. Prófaðu að sveifla þér í Spröngunni – kaðli með hnútum sem er erfiðari en hann lítur út fyrir að vera.
6. Matgæðingar njóta sín á fjölbreyttum veitingastöðum í Eyjum – og þar er einnig brugghús fyrir bjóráhugafólk.
7. Aftur á meginlandið: „Safnaðu“ fossum á Suðurlandi. Heimsæktu Skógafoss, Seljalandsfoss, Hjálparfoss, Háifoss og Gullfoss.
8. Farðu í skipulagða jöklagöngu á Sólheimajökul.
9.  Njóttu stórkostlegs útsýsis í snjósleðaferð á Mýrdalsjökli.
10. Skoðaðu svartan sandinn í Reynisfjöru, stuðlabergið og Reynisdranga – en farðu varlega, brimið getur verið lífshættulegt.

Nánari upplýsingar og fleiri hugmyndir má finna á www.visitvestmannaeyjar.is og www.south.is.