Upplifðu menningu og sögu í Duus safnahúsum í Reykjanesbæ

Duus Safnahús eru einstök menningar- og safnamiðstöð við sjávarsíðuna í Reykjanesbæ þar sem saga, listir og náttúra mætast á einum stað. Byggingarnar, sem áður hýstu verslun og fiskvinnslu, endurspegla ríka sögu svæðisins og mynda heild sem sýnir þróun sjávarútvegs og mannlífs á Suðurnesjum. Elsta húsið, Bryggjuhúsið frá 1877, og yngsta húsið frá 1954, mynda saman lifandi safnasvæði sem dregur gesti inn í fortíðina.

Söguleg hús og fjölbreytt safnastarf í Duus Safnahúsum

Gömlu húsin hafa verið endurnýjuð af natni og hýsa nú sýningarsali Byggðasafns Reykjanesbæjar, Listasafns Reykjanesbæjar og gestastofu Reykjaness UNESCO jarðvangs. Hér má upplifa fjölbreyttar sýningar sem fjalla um sögu sjávarútvegs, menningu svæðisins, myndlist og jarðfræði Reykjanesskagans. Duus safnahús eru því kjörinn staður fyrir öll þau sem vilja kynnast sögu og náttúru Suðurnesja á lifandi og aðgengilegan hátt.

Listir, saga og náttúra á einum stað

Í Duus safnahúsum má sjá sýningar sem varpa ljósi á líf fólks á Suðurnesjum, þróun byggðar og áhrif náttúruaflanna á samfélagið. Listasafnið sýnir fjölbreytta myndlist, bæði samtímalist og verk sem tengjast menningu svæðisins. Í gestastofu jarðvangsins er fjallað um jarðfræði, eldstöðvar og einstaka náttúru Reykjanesskagans, sem er hluti af alþjóðlegu UNESCO neti jarðvanga.

Gönguleiðir og upplifun við sjávarsíðuna

Gestir geta notið fersks sjávarloftsins við Duus safnahús, hlustað á öldugjálfrið og ímyndað sér sjómenn fortíðar róa til fiskjar. Nálægt safninu er Skessan í hellinum, vinsæll áfangastaður fyrir fjölskyldur, og þaðan liggja fallegir göngustígar meðfram ströndinni og smábátahöfninni.

Minjagripir og minningar frá Duus safnahúsum

Í húsunum er vönduð safnbúð þar sem gestir geta fundið bækur, handverk og minjagripi sem tengjast sögu og menningu svæðisins. Heimsókn í Duus safnahús er upplifun sem sameinar fræðslu, náttúru og listir á einum stað og hentar bæði fjölskyldum, ferðamönnum og áhugafólki um sögu Suðurnesjanna.

Tíu hugmyndir af afþreyingu á Reykjanesi:

1. Á Reykjanesi eru fjölmargar fallegar gönguleiðir.
2. Víkingaheimar eru í fallega hannaðri byggingu í Reykjanesbæ. Þar má sjá víkingaskipið Íslending, eftirlíkingu Gaukstaðaskipsins sem fannst í Noregi árið 1880.
3. Gakktu yfir Brúna milli heimsálfa; hvergi er auðveldara að fara á milli Evrópu og Norður-Ameríku.
4. Skoðaðu aðra staði í Reykjanes UNESCO jarðvangi, svo sem Fagradalshraun, fallega hraunhella, Gunnuhver eða Brimketil.
5. Dáðstu að litríku jarðhitasvæðinu í Seltúni við Krýsuvík og sjáðu gufurnar stíga upp með tilheyrandi brennisteinslykt.
6. Rokkið lifir í Reykjanesbæ. Skoðaðu Rokksafn Íslands í Hljómahöll, safn um sögu popp- og rokktónlistar á Íslandi.
7. Skoðaðu tignarlegan Reykjanesvita, fyrsta vita landsins. Þar er einnig stytta af síðasta geirfuglinum með útsýni til Eldeyjar.
8. Krýsuvíkurbjarg er stærsta fuglabjarg Reykjaness með um 60.000 varpfugla á sumrin. Upplagt fyrir áhugafólk um fuglalíf og náttúru.
9. Ef þú ert á ferðinni í myrkri skaltu fylgjast með norðurljósaspá. Í heiðskíru veðri er hrífandi útsýni við Garðskagavita þar sem brimið getur verið stórfenglegt.
10. Skelltu þér í eina af sundlaugum eða baðstöðum svæðisins. Vatnaveröld í Keflavík er tilvalin fyrir fjölskyldur og ekki má gleyma hinu heimsfræga Bláa lóni.

Nánari upplýsingar má finna á visitreykjanes.is.