Lifandi saga bæjarins – sýningar sem endurspegla menningu og mannlíf

Byggðasafn Hafnarfjarðar varðveitir og miðlar menningarsögu bæjarins með fjölbreyttum sýningum sem endurspegla líf, störf og samfélag Hafnfirðinga frá 19. öld til dagsins í dag. Á sjö sýningarsvæðum safnsins má upplifa bæði daglegt líf alþýðunnar og sögu athafnafólks sem mótuðu bæinn.

Pakkhúsið – saga, leikföng og þemasýningar

Í Pakkhúsinu er að finna fastasýninguna „Þannig var…” þar sem saga Hafnarfjarðar og nágrennis er rakin frá landnámi til nútímans með textum, ljósmyndum og fjölmörgum gripum. Á efstu hæð hússins er skemmtileg leikfangasýning fyrir börn og í forsal hússins eru reglulega settar upp þema- og farandsýningar sem varpa ljósi á tiltekin tímabil eða atburði.

Söguleg heimili og líf fólksins í bænum

Siggubær frá 1902 sýnir hvernig alþýðufólk bjó á fyrri hluta 20. aldar, en Sívertsens-húsið, reist á árunum 1803–1805, gefur innsýn í líf yfirstéttarfjölskyldu á upphafi 19. aldar. Í Bookless Bungalow má kynnast skosku bræðrunum Harry og Douglas Bookless sem ráku umfangsmikla útgerð í Hafnarfirði á fyrstu áratugum 20. aldar.

Verslunarsaga og ljósmyndir úr fortíðinni

Beggubúð hýsir verslunarminjasafn þar sem gestir geta séð hvernig verslun og viðskipti þróuðust í bænum. Á Strandstígnum meðfram höfninni er ljósmyndasafn Byggðasafns Hafnarfjarðar með sýningum sem varpa ljósi á daglegt líf, störf og sögu fólksins sem byggði bæinn.

Gúttó – vagga félags- og menningarlífs

Góðtemplarahúsið, eða Gúttó, var fyrsta eiginlega samkomuhús Hafnfirðinga og rúmaði um 300 manns þegar íbúar bæjarins voru aðeins um 400. Í húsinu er sýningin „Gúttó – Hús templara, vagga félags- og menningarlífs í 130 ár” sem segir sögu félagsstarfs, samkomuhalds og menningar í bænum.

Lifandi tenging við sögu og samfélag

Byggðasafn Hafnarfjarðar sinnir mikilvægu hlutverki í að safna, skrásetja og varðveita menningarminjar bæjarins og kynna þær fyrir gestum á lifandi og aðgengilegan hátt. Sýningarnar endurspegla fjölbreytt mannlíf, atvinnuhætti og sögu Hafnarfjarðar og skapa einstaka tengingu við fortíðina.

Tíu hugmyndir að afþeyingu í Hafnarfirði og nágrenni:

1. Kynntu þér bústaði álfanna og „huliðsheima“ Hafnarfjarðar, sem eru m.a. í skrúðgarðinum Hellisgerði og víðar í hraunmyndunum bæjarins.
2. Farðu aftur til víkingatímans og taktu þátt í veislu í Fjörukránni. Taktu þátt í árlegri Víkingahátíð Hafnarfjarðar um miðjan júní.
3. Heimsæktu vinsæl kaffihús, bakarí og veitingastaði bæjarins, eins og Pallett, Brikk og Von Mathús.
4. Í heimsókn þinni í Hafnarfjörð skaltu njóta útsýnisins af Hamrinum eða Ásfjalli og ganga umhverfis Ástjörn eða Hvaleyrarvatn.
5. Heimsæktu Hafnarborg, menningar- og listarmiðstöð Hafnarfjarðar. Skoðaðu þar sýningar eða hlustaðu á tónleika.
6. Farðu í útreiðartúr með Íshestum í töfrandi náttúru nærri Kaldárseli og Helgafelli.
7. Ef þú ert í Hafnarfirði í desember þá máttu ekki missa af heimsókn í Jólaþorpið á Thorsplani.
8. Farðu út á Áftanes og skoðaðu kirkjuna á Bessastöðum, herminjar o.fl.
9. Hjólaðu meðfram sjávarsíðu höfuðborgarsvæðisins, alla leið frá Hafnarfirði að Gróttuvita á Seltjarnarnesi.
10. Skoðaðu tungllandslagið við Kleifarvatn  og hverasvæðið við Seltún í Krýsuvík. Stutt er þaðan að Krýsuvíkurbjargi,  þar sem er mikið fuglalíf.